عبث

ينغلق عليّ قلبي..أنغلق على نفسي..و تنغلق عليّ حوائط غرفتي..

متي كانت اخر مرة غادرت هذا المكان؟؟؟

مش فاكر...

حبيس أنا..حبست نفسي بنفسي..

لن تفيدني توسلاتي و محاولاتي البائسة..

أليس كذلك؟؟

بماذا تفيد الصلاة شخصا كافرا يجزم أنّ السماء خالية من الا­­لهة ؟

صلاته عبث..و محاولاتي للتقرب منك عبث و عبث..

حبيس..عابث..عبوس..

هذا أنا

عزيزي الحبيب..صديقي المخلص..ابليس

مش من حقك تلومني أو تنتقدني..

هو صديقي المخلص و هو عزيزي الحبيب..

مش انت اتخليت عني ؟؟

أنا لست ندلا أو ناكرا للجميل..

لم تمتد لي يد أحد غيره..لما ايديك انت ما اتمدتش

هو انتشلني من ضياعي و شاور لي على طريق..

مش فارقة ايه هو الطريق..المهم اني اتخلصت من حيرة الاختيار..

لست ندلا عشان أنسى مساعدته..

لم يتخل عني لحظة..

ظل دائما في ظلام قلبي حتى لا أشعر بالوحدة..

تخليت عني انت فرفض هو أن يتركني لخيالات رأسي..

كنت دائما تشعرني أنني حقير..أنني قذر..

أنك تفضلت عليّ حينما اتخذتني صديقا..

كرهت نفسي و حياتي..

أما هو فأشعرني كم أنا شخص ذكي..لامع..برّاق

لست ندلا أو ناكرا للجميل حتى أنسى هذا..

لطالما أشعرتني أنني شيطان صغير تعمل على ترويضه..

يمكن عشان كده احتضنني هو..لأنني من بني جنسه..

أنا إذا قذر..حقير..شرير..

أليس هذا ما كنت دائما تقول؟؟

فلنر إذا لأي درجة ستصل قذارتي..إلى أي درجة سيمتدد شري

إعترافات فلان الفلاني

دخل من باب البيت بعد يوم شاق..

بعد يوم قاتل..قتل كل حاجة حلوة في حياته..

قعد على كرسي بعد ما جاب ورقة و قلم..

و بدأ يكتب..

----------------------------------------------

أعترف أنا فلان الفلاني أنني شخص قذر..

وقح..

غبي..

أضعت كل شي في لحظة..

أعترف أنني لا أستحق الحب و الشفقة..

أعترف أنني لا أستحق إخلاصك..

لا أستحق عينيك المليئتين بالحب و الإهتمام..

أعترف أنني أتغذى على ظلام القلب..

لطالما شككت أنني شيطان أو دجّال مسيخ..

يتصارع قلب كل إنسان ما بين خير و شرّ..

بينما يصارع قلبي نفسه ما بين شرّ و شرّ..

الان وجب علي حمايتك من شرّي..و من خبثي..

و لذلك سأخلصك منهما بعد لحظات..

إمضاء

فلان الفلاني

----------------------------------------------

لحظة صمت..و بعدها أشرقت الشمس و زقزقت العصافير..

مبشّرة الناس بموت شرّ فلان الفلاني .

تهرب ؟ أهرب ، غصب عني أهرب

طول عمري باهرب بس مش واخد بالي..

أخدت بالي بس لما واحد صاحبي سألني ازاي يهرب..

قلتله إطلع على سريرك..إفرد جسمك..غمض عينيك..و إحلم..

ساعتها بس اكتشفت إني طول عمري باهرب في أحلامي..

بس ايه هو الهروب ؟؟

الهروب إنك تنتقل بروحك من مكان بيخنقك..لمكان بيحييك..

تهرب من إكتئابك..من مشاكلك التافهة..

تهرب من التعليم..من مسئولية..

من أي حاجة ممكن تتخيلها..

بس أنا بقى هربت من الواقع..

أصله كئيب بشكل..و حزين بأشكال..

كان لازم أهرب عشان اقدر أعيش..

كل يوم في ميعاد نومي باهرب..

وكل مرة أهرب لمكان غير الهروب اللي قبله..

أول ما أغمض عيني بابقى شخص تاني..

في زمان تاني..

في مكان تاني..

في واقع تاني..

مرة باكون فارس شجاع..

قائد ثورة ضد الظلم..

الناس واقفة ورايا تصرخ باسمي..

باشوف حب و تأييد عمري ما لقيته في الحقيقة..

مرة تانية باكون شخص جريح..بين ايدين حبيبتي..

دم و نزيف و ألم..

دموعها نازلة تجري خوف عليا..

هنا لقيت الإهتمام اللي عمري ما لقيته في الحقيقة برضه..

مابقيتش حاسس بالألم..

لو فضلت عايش في واقعي من غير هروب ماكنت هاقدر أعيش..

كان زماني اتجننت..أو انتحرت..

مافيش أي اختيار ثالث للأسف..

غير الهروب..

علشان كده غصب عني اتضطريت إني أهرب