تهرب ؟ أهرب ، غصب عني أهرب

طول عمري باهرب بس مش واخد بالي..

أخدت بالي بس لما واحد صاحبي سألني ازاي يهرب..

قلتله إطلع على سريرك..إفرد جسمك..غمض عينيك..و إحلم..

ساعتها بس اكتشفت إني طول عمري باهرب في أحلامي..

بس ايه هو الهروب ؟؟

الهروب إنك تنتقل بروحك من مكان بيخنقك..لمكان بيحييك..

تهرب من إكتئابك..من مشاكلك التافهة..

تهرب من التعليم..من مسئولية..

من أي حاجة ممكن تتخيلها..

بس أنا بقى هربت من الواقع..

أصله كئيب بشكل..و حزين بأشكال..

كان لازم أهرب عشان اقدر أعيش..

كل يوم في ميعاد نومي باهرب..

وكل مرة أهرب لمكان غير الهروب اللي قبله..

أول ما أغمض عيني بابقى شخص تاني..

في زمان تاني..

في مكان تاني..

في واقع تاني..

مرة باكون فارس شجاع..

قائد ثورة ضد الظلم..

الناس واقفة ورايا تصرخ باسمي..

باشوف حب و تأييد عمري ما لقيته في الحقيقة..

مرة تانية باكون شخص جريح..بين ايدين حبيبتي..

دم و نزيف و ألم..

دموعها نازلة تجري خوف عليا..

هنا لقيت الإهتمام اللي عمري ما لقيته في الحقيقة برضه..

مابقيتش حاسس بالألم..

لو فضلت عايش في واقعي من غير هروب ماكنت هاقدر أعيش..

كان زماني اتجننت..أو انتحرت..

مافيش أي اختيار ثالث للأسف..

غير الهروب..

علشان كده غصب عني اتضطريت إني أهرب

مايصّحش

لكل فعل رد فعل...

أنا عارف إنه مضاد له في الاتجاه...

بس انت شكلك مش عارف إنه بيكون مساوي له في القوة...

مع إن الشرطين دول مهمين جدا علشان يحصل اتّزان...

ولا يمكن نسيت؟؟

انا عارف ان احنا اصحاب قوي..و يمكن عشان كده بنتخانق كتير...

بس المشكلة الفرق بيننا كبير...

أنا بازعل 5 دقايق و بعدين أروق...

إنما انت...يااااااااه...

مش باقولك انت ناسي إنه مساوي له في القوة ؟؟

أنا عارف إني كنت غلطان في حاجات كتير...

و عملت غلطات كتير...

و عشان إحنا اصحاب ، انت سامحتني...

و عشان كده برضه بقينا أصحاب أكتر..

بس انت انهاردة ضايقتني...

أنا عمري ما لفتّ نظرك قبل كده إن رد فعلك على الفعل بيكون مبالغ فيه..

يمكن لمّحت لك من بعيد..بس عمري ما قلتها صريحة...

إنما كان المفروض أقول من الأول..

علشان انهاردة حصل حاجة غريبة..

طلع مني أتفه فعل عملته من يوم ما عرفتك...

بس انت ردّيت عليه بردّ فعل أكبر من أي حاجة تانية..

و كأنّي ارتكبت ذنب كبير..لا يغتفر...

رغم إني مش ملاك..بس انت كمان مش ملاك..

و مع إن أنا اليومين دول كنت مبسوط قوي أكتر من أي وقت

و انت عارف ليه..

بس انت عكننت عليّا..و ضايقتني..

و المشكلة إنك شايف إنك لسة ماحصلش منك رد فعل..

و بتبصلي بعينيك السودة و بتوعدني بالانتقام..

و علشان كده..

أنا زعلان

جون فيمّ

اسمه جون فيمّ...
تنطق بالفرنسية طبعاً..
تدمج ال و مع ال ن في حرف أخنف حيث لا يُنطق حرف النون..
فرنسي من أصل اسيوي...
ازاي عرفت انه اسيوي ؟؟ بسيطة قوي
جسم صغير جدا و نحيل جدا...كأنه طفل
بشرة صفراء إلى حد ما و عيون ضيقة مسحوبة..
كان مدرس اللغة الفرنسية في أولى ثانوي..
مدرستنا بناءها حلو قوي..من جوّة و من برّة..
كأننا قاعدين في قلعة أو في أحد قصور العائلة المالكة...
واقف قدامنا راجل اسيوي..بيتكلم فرنساوي..
و عشان كده حسّينا معاه احساس غريب..
كأننا في زمن تاني..في بلد تاني..في كون تاني
اتعودت اقف معاه كتير على مدار اليوم...
نتكلم في حاجات كتير بس مش كل حاجة..
كان دايما يقول..بلغة فرنسية طبعا..
ان في مصر ممنوع الكلام في ثلاث مواضيع..
الدين أو الجنس أو السياسة..
و كل من نقرب أنا و زمايلي من أي موضوع فيهم..يرفع حواجبه..
و يقول لا... في مصر ممنوع الكلام في الدين أو الجنس أو السياسة..
بفرنسية طليقة طبعا....
في مرة سألته هو أصلا منين..
قالي اسم غريب قوي..عمري ما افتكره..
بلد عمري ما سمعت عنه..
و المفروض ان ابوه و امه هربوا على فرنسا بعد ما قامت الحرب...
جابلي خريطة و شاور على بلده
فضلت أدور و أبص مش شايف اللي هو بيقول عليه..
هو الراجل ده حقيقي ؟
أكيد شخص خيالي ، جذوره في بلد خيالي ، هرب أهله منها بسبب حرب خيالية
أكيد شخص خيالي ؛ هو انت عمرك شفت راجل اسيوي بيتكلم فرنساوي ؟
في مرة تانية سألته ايه اللي يخلّيه يسيب فرنسا و ييجي يدرّس في مصر ؟
قالي ان في فرنسا..
لما ييجي ميعاد التجنيد في الجيش..
كل واحد بيتجند بحسب تخصصه..
هو دارس لغة و أدب..
عشان كده مهمته هي تدريس اللغة و الأدب في مدرسة فرنسية خارج فرنسا..
انما موضوع مصر ده مجرد صدفة..
ابتدينا نتكلم معاه عن التجنيد في مصر..
بسخرية..
ازاي الناس بتهرب منه...
ابتدا الموضوع يتغير للكلام في حال البلد كلها...
رفع حواجبه..
ممنوع في مصر نتكلم في الدين أو الجنس أو السياسة..
الراجل ده لفت نظري لحاجات كتير..
علمني ازاي أكون منفتح عقليا و اقبل الاخر...
زي ما عقلي استوعب ان في رجل اسيوي لا ينطق لسانه سوى بالفرنسية..
و مايعرفش لنفسه وطن غير فرنسا...
نفسي أقابله تاني ولو مرة واحدة...
هاقوله إنه لفت نظري إني في بلدي من حقي اتكلم في أي موضوع...
دين...جنس...أو حتى سياسة..
حتى لو حاربت الكون كله علشان أستعيد الحق ده