Sunday 10 May 2009

جون فيمّ


اسمه جون فيمّ...
تنطق بالفرنسية طبعاً..
تدمج ال
و مع ال ن في حرف أخنف حيث لا يُنطق حرف النون..
فرنسي من أصل اسيوي...
ازاي عرفت انه اسيوي ؟؟ بسيطة قوي
جسم صغير جدا و نحيل جدا...كأنه طفل
بشرة صفراء إلى حد ما و عيون ضيقة مسحوبة..
كان مدرس اللغة الفرنسية في أولى ثانوي..
مدرستنا بناءها حلو قوي..من جوّة و من برّة..
كأننا قاعدين في قلعة أو في أحد قصور العائلة المالكة...
واقف قدامنا راجل اسيوي..بيتكلم فرنساوي..
و عشان كده حسّينا معاه احساس غريب..
كأننا في زمن تاني..في بلد تاني..في كون تاني
اتعودت اقف معاه كتير على مدار اليوم...
نتكلم في حاجات كتير بس مش كل حاجة..
كان دايما يقول..بلغة فرنسية طبعا..
ان في مصر ممنوع الكلام في ثلاث مواضيع..
الدين أو الجنس أو السياسة..
و كل من نقرب أنا و زمايلي من أي موضوع فيهم..يرفع حواجبه..
و يقول لا... في مصر ممنوع الكلام في الدين أو الجنس أو السياسة..
بفرنسية طليقة طبعا....
في مرة سألته هو أصلا منين..
قالي اسم غريب قوي..عمري ما افتكره..
بلد عمري ما سمعت عنه..
و المفروض ان ابوه و امه هربوا على فرنسا بعد ما قامت الحرب...
جابلي خريطة و شاور على بلده
فضلت أدور و أبص مش شايف اللي هو بيقول عليه..
هو الراجل ده حقيقي ؟
أكيد شخص خيالي ، جذوره في بلد خيالي ، هرب أهله منها بسبب حرب خيالية
أكيد شخص خيالي ؛ هو انت عمرك شفت راجل اسيوي بيتكلم فرنساوي ؟
في مرة تانية سألته ايه اللي يخلّيه يسيب فرنسا و ييجي يدرّس في مصر ؟
قالي ان في فرنسا..
لما ييجي ميعاد التجنيد في الجيش..
كل واحد بيتجند بحسب تخصصه..
هو دارس لغة و أدب..
عشان كده مهمته هي تدريس اللغة و الأدب في مدرسة فرنسية خارج فرنسا..
انما موضوع مصر ده مجرد صدفة..
ابتدينا نتكلم معاه عن التجنيد في مصر..
بسخرية..
ازاي الناس بتهرب منه...
ابتدا الموضوع يتغير للكلام في حال البلد كلها...
رفع حواجبه..
ممنوع في مصر نتكلم في الدين أو الجنس أو السياسة..
الراجل ده لفت نظري لحاجات كتير..
علمني ازاي أكون منفتح عقليا و اقبل الاخر...
زي ما عقلي استوعب ان في رجل اسيوي لا ينطق لسانه سوى بالفرنسية..
و مايعرفش لنفسه وطن غير فرنسا...
نفسي أقابله تاني ولو مرة واحدة...
هاقوله إنه لفت نظري إني في بلدي من حقي اتكلم في أي موضوع...
دين...جنس...أو حتى سياسة..
حتى لو حاربت الكون كله علشان أستعيد الحق ده

3 comments:

  1. رااااااائع ;)
    بجد عجباني
    بس أنت جيت علي الجرح.. لسه النهاردة كان عندي
    و عملت زفت.. فامشOral
    طيقة ولا فرنسي ولا سرته =(

    ReplyDelete
  2. فيتنام بتتكلم فرنساوي
    و الملايو كانت محتلة من فرنسا
    هو منين بقى؟؟؟؟؟

    ReplyDelete
  3. بس انا رايي اتكلم في السياسة براحتك ,لكن الجنس عيب و الدين انت مش دارسه و هتلاقي الاخوان نطولك فعلى ايه؟؟؟؟؟

    ReplyDelete