Friday 15 May 2009

مايصّحش


لكل فعل رد فعل...

أنا عارف إنه مضاد له في الاتجاه...

بس انت شكلك مش عارف إنه بيكون مساوي له في القوة...

مع إن الشرطين دول مهمين جدا علشان يحصل اتّزان...

ولا يمكن نسيت؟؟

انا عارف ان احنا اصحاب قوي..و يمكن عشان كده بنتخانق كتير...

بس المشكلة الفرق بيننا كبير...

أنا بازعل 5 دقايق و بعدين أروق...

إنما انت...يااااااااه...

مش باقولك انت ناسي إنه مساوي له في القوة ؟؟

أنا عارف إني كنت غلطان في حاجات كتير...

و عملت غلطات كتير...

و عشان إحنا اصحاب ، انت سامحتني...

و عشان كده برضه بقينا أصحاب أكتر..

بس انت انهاردة ضايقتني...

أنا عمري ما لفتّ نظرك قبل كده إن رد فعلك على الفعل بيكون مبالغ فيه..

يمكن لمّحت لك من بعيد..بس عمري ما قلتها صريحة...

إنما كان المفروض أقول من الأول..

علشان انهاردة حصل حاجة غريبة..

طلع مني أتفه فعل عملته من يوم ما عرفتك...

بس انت ردّيت عليه بردّ فعل أكبر من أي حاجة تانية..

و كأنّي ارتكبت ذنب كبير..لا يغتفر...

رغم إني مش ملاك..بس انت كمان مش ملاك..

و مع إن أنا اليومين دول كنت مبسوط قوي أكتر من أي وقت

و انت عارف ليه..

بس انت عكننت عليّا..و ضايقتني..

و المشكلة إنك شايف إنك لسة ماحصلش منك رد فعل..

و بتبصلي بعينيك السودة و بتوعدني بالانتقام..


و علشان كده..

أنا زعلان

3 comments:

  1. ana bgd klamk da 3gbnyy awii awii 3shn kol kelma fih sa77 w kol kelma fih ana 7ssa biha bgd w 7ssa enk 7ases biha f3ln msh mogrd klam enta ktbo w 5las,,um Rania

    ReplyDelete
  2. thank u begda...sa3at betedee3 sekaty be nafsy...bas el kalam elly zay dah beyshaga3ny eny akamel :D

    ReplyDelete
  3. l2 kml 3shn klami da bgd msh thiis:)

    ReplyDelete