البعبع

كل ما يمشي في الشارع...

بيشوف الرعب في عيون الناس..

بنت جاية في وشه تقف فجأة و تروح على الرصيف التاني...

كأنها شافت عفريت...

راجل عجوز يحط وشه في الأرض و يستعيذ...

بنوتة صغيرة عاملة ضفيرة بتشاور عليه...و تسأل...

هو ده البعبع يا ماما؟؟؟ و ماما بتشدها بعيد..ششششششش...قعدي ساكتة يا بنت...

بس هو مش فارق معاه...

لا يتألم و لا يتضايق...

كل بس اللي مجننه هو ازاي بقى كده؟؟؟

هو مش معترض إنه يكون كده...هو بس معترض إنه مش عارف إزاي...

كان طول عمره شكله عادي...مش حلو و مش وحش...

بس في يوم...

كل حاجة جواه طلعت على الوش...

فساده و ضياعه...

حقده...غضبه...كرهه...

نفاقه...

خيانته لوطنه لأنه ساكت و ماعملش حاجة...

أيوة طبعا..ماهو الساكت عن الحق شيطان أخرس...

كل حاجة سودة ؛ لاملموسة كانت جواه..طلعت لبرّة...

اتحولت فجأة لمادة قبيحة...ملموسة...

كائن قبيح...يرى و يسمع ولا يتكلم...

لا علاقة له بالبشر..ولا حتى يقارن بالأباليس...

بس للأسف...

هو برضه مش معترض إنه يبقى كده..

الحلم

حلمت حلم عجيب...و غريب

الدنيا ضلمة قوي...كأننا في عز الشتا...

في عز النوة

ماشي في طريق ضيق

ضباب طالع من عينيا...

ضباب خفيف مش كتير...تقدر تشوف قدامك كويس...

بس حوّل كل حاجة غامقة

شجر مقلوع...

مخلوع...

واقع في كل حتة...

أشجار ميتة...

فروعها عريانة من غير ورق

شجر على شكل ناس..بيصرخوا...

بيطلبوا الرحمة...

كأنهم بيتعذبوا في جهنم...

بقايا بشر...

ردم إنسانية واقع في كل جانب من جوانب الطريق

الأنهار اتحولت دم...

الهوا اتمسخ لروائح كريهة...

و في أخر الطريق...

حاجة غريبة...

وردة واقفة في وسط كل ده...

وردة بيضة...وردة حلوة... منورة

جسمها الأخضر الجميل مفرود...

واقفة في وش الضباب...في وش الكئابة...

و صحيت حاسس بالأمل...

إستفزاز

لما باكتئب...حاجات كتير بتستفزني...
حاجات بسيطة قوي بتولع فيا نار...
زي ايه؟؟
زي مثلا ضحكة ...
أشوف حد بيضحك....
بيضحك ليه؟؟؟
هو مش شايف اللي بيحصل حوالينا ولا ايه؟؟؟
ناس مش لاقية تاكل..
حرية مش موجودة..مجرد حلم..
بلد بقت عاملة زي الخرابة..
فساد في كل حتة..
من أول الوزير الل بيشتغل لمصلحته ، لغاية الطالب اللي بيغش في امتحان..
مجاعات في دول العالم الثالث..
أزمة اقتصادية..
أمريكا و عصابتها...
حروب و ناس بتتقتل..
ظلم في كل مكان...
و الناس لها نفس تضحك؟؟؟ طيب ازاي؟؟
امنعوا الضحك..
بطلوا هزار و حياة على الفاضي..
إشتغلوا و اعملوا كل اللي تقدروا عليه علشان تصلحوا اللي حواليكم
و لما كل حاجة ترجع حلوة تاني...
هتضحكوا من قلبكم...و صدقوني..
الضحك من القلب له طعم تاني

خبيث

كان صديقا لنا...كان قريبا منا...

لكننا عرفناه على حقيقته...كشفنا حقيقته عارية ...

في البداية كنا مصدقينه...و واحدة واحدة بدأ ينكشف قدامنا...

أول سبب دعاني للشك فيه...كانت رائحة كلماته النتنة...

فقد تحولت كلماته فجأة إلى خطط لئيمة يلف بيها و يدور...

بقيت باحس دايما إن كل كلمة بيقولها لسبب...

لبعد تاني في المستقبل...

حكيم من حكماء صهيون الدواهي...

خبيث...بدأت عينيه تلمع بلون أحمر خبيث...

ملامحه بدأت تتغير...

في مرة...خدشني بمخالبه غير المرئية...

أبص على ايدي أشوف الخدش...موجود...

محفور باللون الأحمر ؛ لون عينيه الخبيث...

و أبص على صوابعه ؛ مفيش مخالب...

إيه الشيء ده؟؟؟؟ إزاي امتلك تلك القدرة الفذة على التنكر في شكل بشر طول المدة دي ؟؟

خيالات أنيابه...رائحة أنفاسة القذرة...كل ده بييجي و يروح...

أول ما أحس إن الكائن ابتدا يظهر ؛ يخفيه...

كأنه عايز يجنني...

بس خلاص...مش أنا بس اللي شاكك...

بالعكس...

كلنا اتأكدنا من حقيقته المقززة...

و نصبنا له الأفخاخ...

و قريب قوي...

هايقع في المصيدة...

اكتئابي...كائن ظلام

علاقتي باكتئابي تشبه كتييير علاقة الرجل الذئب بالقمر...
على طول شايفه و مستنيه يكمل و يبقى بدر... مرتبط بيه جدا و في نفس الوقت باخاف منه...
بيحولني لشيء تاني...
كائن تاني...
كائن ظلام...يعيش في الظلام و للظلام...

النور يضايقني و يضايق عينيا...
بيسرق مني كل طاقتي و قوتي...
بيخليني أفضل في سريري على طوووووول زي مصاص الدماء اللي بينام في تابوته قرون...
بافقد حواسي كلها...لا أرى..لا أسمع ولا أتكلم...
الكائن اللي برا هو اللي بيعمل كل حاجة..
.إنما أنا بافضل محبوس جوة...مخنوق...كأنه ربطني و كممني...
نفسي و أصرخ و أقول طلعوني...
بس ماحدش سامعني...
بابقى نفسي اٌقطع جلده...أو جزء صغير منه فوق الرسغ...
جزء يسمح لروحي إنها تخرج من حبسها...
و ابقى حر للأبد

سدّة نِفس

خلصت يومي الساعة واحدة بالليل و رحت على هناك...

عشان ألاقي مستنيني مفاجأة جديدة من مفاجأتهم الللئيمة...الخبيثة...غلط ناتج عن غلط السكوت من الأول...

و الغلط مايترتبش عليه غير الغلط...

خناقة كالعادة...صوت عالي و زعيق...

بعدها كل باب يتقفل عشان كل واحد فينا يتحبس...بس مش لوحده...

معاه غضبه...معاه خنقة من إنه معرفش يفرض كلمته على التاني...

طلعت برة...قعدت لوحدي للساعة خامسة...اتخانق في سري...

أشوف أحلام يقظتي و أنا بانتصر و بافرض كلمتي على الكل...بافرض إرادتي من غير اعتراض...

ديكتاتور ؟؟؟ يمكن...

فضلت طول ليلي نفسي مسدودة...نفسي أكتب بس مش قادر...مش عارف...

حالة الاكتئاب شكلها جاية بدري الشهر ده...

مش مصبرني غير انه كمان شوية...الشمس هتطلع...

الدنيا هتنور...

العصافير هتزقزق...

و بعدها هاروح اقابل ناس بحبها...

حاسب من الأحزان و حاسب لها

حاسب على رقابيك من حبلها

راح تنتهي و لابد راح تنتهي

مش انتهت أحزان من قبلها...؟!!