Friday 13 March 2009

نفسي أصرخ في وش المسخ


أول حاجة تعالوا نعرف ايه هو المسخ ؟؟؟
( كفعل مش كإسم )...


المسخ هو عملية يتطور من خلالها الحيوان جسديا بحدوث تغير مفاجيء في شكل الحيوان و صفاته و هي عملية يرافقها عادة تغير في سلوك الحيوان...و يقال أيضا ان المسخ يعني تشوه يحدث للمخلوق أو هو رجوع المخلوق لسلالة أدنى ، يعني من الاخر أي كائن شكله كده متلخبط سواء في شكله أو في روحه يبقى مسخ .

طيب...لو افترضنا – ده لو يعني – إن الانسان هو أذكى الحيوانات... يبقى أكيد الانسان الممسوخ أكثر تعقيدا من أي ممسوخ تاني... عايزين مثال على كلامي...انزل الشارع في مصر...و اتفرج...قولي هتلاقي كام نوع من المسوخ ؟؟؟

هتلاقي البنت المحجبة اللي حاطة ايشارب على دماغها - إنما – لابسة بنطلون ضيق ، أو جيبة واصلة لتحت ركبتها شوية ، أنا لسة امبارح شايف مسخ من الفصيلة دي ، كانت لابسة جيبة فوق الركبة بس طبعا عشان تغطي رجليها فهي كانت لابسة شراب حريمي لونه اسود و ده طبعا عشان ماتكشفش عن جسمها . ده غير ان الفصيلة دي بيتميز نسبة كبيرة منها بالسيجارة في ايديها أو الشيشة لو كانت قاعدهفي كافيه .

عايز نوع تاني ؟؟؟ بسيطة...احنا معندناش اكتر منهم في الشارع المصري...

عندك مثلا الراجل أبو ذقن و زبيبة ، عم الحاج ، الشيخ التقي ، اللي ماشي في الشارع يتفرج على البنات ، أو سايق عربيته بطريقة مستفزة مالوش دعوة باللي سايق جنبه أو اللي عايز يعدي الشارع – مع إن الإسلام المعاملة – و يا سلام بقى لو كان إمام جامع وواقف على المنبر في صلاة الجمعة يدعي من قلبه :" اللهم أطل في عمر حكامنا و احميهم ." و هو بيسح في الدموع...اه صحيح ، ده حتى واحد منهم مرة أفتى إن الأعتراض على الحاكم الظالم حرام لأنه قضاء من عند الله ولا يجوز للإنسان أن يعترض على مشيئة الله .

نقول كمان ؟؟؟ فكر انت بقى و انت ماشي في الشارع و بتتفرج على الناس...شوف كام واحد منهم شكله المفروض انه من أبناء اّدم بس فايحة منه ريحة المسخ و التشوه و التغير في السلوك ؟؟؟

كام واحد ماشي هدومه مقطعة و بيكلم نفسه ؟؟ ابقى عدهم في المشوار الواحد هتستغرب من عددهم..! كام واحد شكله ماستحماش من سنين واقف يدور في صناديق الزبالة على حاجة ياكلها...؟؟

و أنا ماشي على الرصيف بلاقي الناس ماشية ببلادة ولا مبالاة...ببطء مميت مع العرجة الشهيرة اللي بيمشي بيها الزومبي ...كإن مخهم فاضي ...ممسوح و ممسوخ...

كتير باكون نفسي اقف في وسطهم...في وسط الشارع ، واصرخ فيهم و اضربهم قلمين يفوقوهم و اقولهم فوقوااااا ... بس لما باتخيل هيكون ايه رد فعلهم ؟؟ بالاقي النتيجة لونها اسود غامق...عشان لو الكائنات دي لها رد فعل و بتتفاعل مع ما يدور من حولها... كانوا تفاعلوا من زمان و ماكنش ده بقى حالهم...الأسواني قالها قبل كده على لسان زكي الدسوقي و أنا باكررها تاني
إحنا في زمن المسخ

4 comments:

  1. 1st of all weeeee I can read hehe xD
    2nd 3aref Rouseau!! el ragel dah 2al nazaraya w ana moktn3a biha awii.. en a7na atwaldna kewayiiin w el moktm3 howa 2li lawthna.. ana shyfa en el exmples 2li enta 2ylha bat2ked keda.. fa el moso5 dool homa da7aya moktm3 mas5 aslan..

    ReplyDelete
  2. Yeah, we are way deformed That there is no way turning back, Hypocrisy, selfishness and Ignorance have consumed us.
    Till it become a way of life, a necessity.

    ReplyDelete
  3. can't agree more with u both...
    thx 4 sharin' ur opinions :)

    ReplyDelete
  4. i totally agree with u all
    el mogtama3 we el zroof eli by7otna feha hma eli 3amalo el mso5 de we 3la fekra ai wa7d mnna gwaah 7ta momken tt7awel l mas5 law hwa sabha bas el 3a2l hwa eli bymnaa3 da
    that's my opinion

    ReplyDelete