اكتئابي...كائن ظلام

علاقتي باكتئابي تشبه كتييير علاقة الرجل الذئب بالقمر...
على طول شايفه و مستنيه يكمل و يبقى بدر... مرتبط بيه جدا و في نفس الوقت باخاف منه...
بيحولني لشيء تاني...
كائن تاني...
كائن ظلام...يعيش في الظلام و للظلام...

النور يضايقني و يضايق عينيا...
بيسرق مني كل طاقتي و قوتي...
بيخليني أفضل في سريري على طوووووول زي مصاص الدماء اللي بينام في تابوته قرون...
بافقد حواسي كلها...لا أرى..لا أسمع ولا أتكلم...
الكائن اللي برا هو اللي بيعمل كل حاجة..
.إنما أنا بافضل محبوس جوة...مخنوق...كأنه ربطني و كممني...
نفسي و أصرخ و أقول طلعوني...
بس ماحدش سامعني...
بابقى نفسي اٌقطع جلده...أو جزء صغير منه فوق الرسغ...
جزء يسمح لروحي إنها تخرج من حبسها...
و ابقى حر للأبد