اسود غامق

أديني أهو أخيرا عملت المدونة ، كانت حجتي في الخطوة دي انها بناءا على طلب صديقة عزيزة قالتلي " انت مش بتقرا كتير ؟ يبقى المفروض تكتب ." بس السبب الأساسي هو فضول شخصي جوايا ، يا ترى هاكون قدها ولا لأ ؟ حد هيعجبه اللي أنا كاتبه ولا ...؟

أنا طول عمري باكتب و باحب أكتب ، أنا حتى فاكر حصص التعبير في مدرسة الرهبان اللي كنت فيها ، كنت دايما باخد في التعبير أعلى درجة مع اني مش الأول على الفصل ، كان المدرس بتاعي بيخليني أصحح معاه في مواضيع الدفعات اللي أصغر مني ، كان دايما يقولي اني شاطر قوي و مهما كان النموضوع المطلوب مني تقليدي ، كنت باقدر أحوله لموضوع شيق و مختلف .
بس...سيبنا من التعبير و المدارس و لعب العيال ده ، كنت دايما باكتب لنفسي و انا في البيت و ابقى مبسوط قوي باللي انا كتبته ، و بعد مدة اقطعه و ارميه ، زي ما بارمي سكيتشات الرسم اللي مش عجباني...كنت باقول زي ما قال جاهين " أما صحيح كلام مجانين "
و ادي الفرصة جت ، و المفروض دلوقتي اني ابدأ اكتب ، بس اكتب عن ايه ؟؟ و ازاي ؟؟
اكيد هاكتب معظم كتاباتي بالعربي بس يا ترى عامية و لا فصحى ؟؟
يمكن على حسب الموضوع .. أكيد كل حاجة هاحسها بطريقة غير التانية
اول ما فكرت هاسمي مدونتي ايه ؟ نط " اسود غامق " في بالي على طول ، اكيد و انت بتقرا دلوقتي بتقول هو في اسود فاتح و اسود غامق ؟؟ و يمكن كمان تكون بتوصفني بكلمات من قبيل أحمق و أبله ، بس الاسم عجبني قوي و مايهمنيش رأيك...مش قصدي أغلط فيك ، بس أنا طول عمري باخاف أعمل اللي على مزاجي عشان محدش ينتقدني، اصل انا ماحبش الموضوع ده خالص و بيعصبني قوي مع ان أنا نافسي ناقد لاذع جدا.
و فكرت ياترى الاسود الغامق ده بيعبر عن ايه ؟!! ووصلت لأكتر من اجابة واحدة :
اللون ده ممكن يكون بيعبر عني ؛ عن شخصيتي الملوثة بالكثير من الشوائب... و ممكن كمان يكون بيعبر عن غضبي ؛ غضبي من أهلي ؟ اه... من البنت اللي حبيتها ؟ جايز... غضبي من كليتي ؟ أكيييد... و لكن أكبر غضب جوايا هو غضبي من بلدي و أهلها...ليه بقيت عاملة كده ؟؟ كل ما ابص اشوف كمية بشعة من ظلم يقابله كمية أبشع من اللامبالاة .
و يمكن كل ده هو اللي وصلني للاجابة التالتة و هي ان الاسود الغامق ده بيعبر عن لون المستقبل اللي انا متخيله ، و ساعتها بس عرفت ان دونتي هاتكون المكان اللي اطلع فيه غضبي بطريقتي و المكان اللي هامارس فيه أهم مواهبي... النقد و الانتقاد .
رغيت كتير ؟ معلش... بس أنا بقالي كتير كاتم جوايا و ما صدقت لقيت فرصة اتكلم ...
مش عارف بقى هاطلع قدها ولا لأ ؟؟